Սյունիքի մարզպետի աշխատակազմ

Տոնական ծրագիրը մեկնարկել է հյուրերի դիմավորմամբ, որին հաջորդել է ժամերգությունը Տեղի Սուրբ Գևորգ եկեղեցում։

Ներկաները հարգանքի տուրք են մատուցել Տեղի հավերժության պուրակում՝ ծաղիկներ դնելով հայրենիքի պաշտպանության համար նահատակվածների հիշատակին։

Հայկ Հարությունյանը, ողջունելով ներկաներին, մարզպետի աշխատակազմի և ողջ Սյունիքի անունից շնորհավորել է համայնքի բնակիչներին օրվա առթիվ։ Իր ելույթում նա ընդգծել է Տեղ համայնքի կարևորությունն ու դերը մարզի կյանքում, բնակիչների տոկունությունն ու աշխատասիրությունը, ինչպես նաև մաղթել խաղաղություն, համախմբվածություն, շենացում և նորանոր ձեռքբերումներ։

«Շնորհակալ ենք ձեզ նախորդ դժվար ժամանակներում ձեր ցուցաբերած ուժեղ կամքի և կատարած աշխատանքի համար։ Վստահ ենք, որ այսուհետ Տեղը ավելի արագ կզարգանա և կմնա այն յուրահատուկ կոլորիտն ունեցող համայնքը, որտեղ գալով մենք զգալու ենք մեր նախնիների շունչն ու մեր սերունդների ապագան», - նշել մարզպետի տեղակալը։

Տեղ համայնքի ղեկավար Դավիթ Ղուլունցը հանդիսավոր արարողության ընթացքում շնորհակալագրեր է հանձնել համայնքի զարգացման ու շենացման գործում իրենց ավանդը ներդրած բնակիչներին․ պարգևատրվել են լավագույն անասնաբույժը, հովիվը, մեխանիզատորը, երիտասարդ տնտեսվարը և տարբեր ոլորտներում ակտիվություն ցուցաբերած այլ ներկայացուցիչներ։

Տոնական օրը լի էր ազգային նիստուկացի և կենցաղի ներկայացումով ու ջերմ մթնոլորտով։ Մարզային և համայնքային իշխանությունների ներկայացուցիչները, հյուրերն ու բնակիչները շրջել են տաղավարներով, համտեսել հայկական ավանդական ճաշատեսակները։

Միջոցառումն ուղեկցվել է ազգային երգ ու պարով, համերգային ծրագրով։

Տոնական օրն ամփոփվել է հրավառությամբ։