Սյունիքի մարզպետի աշխատակազմ

Նիստին մասնակցել են մարզի համայնքների ղեկավարները, մարզպետի տեղակալները, մարզպետի աշխատակազմի գլխավոր քարտուղարը, մարզպետի խորհրդականներն ու օգնականները, աշխատակազմի կառուցվածքային ստորաբաժանումների ղեկավարները, հանրապետական գործադիր մարմինների տարածքային ստորաբաժանումների և մարզի իրավապահ մարմինների, ուժային կառույցների ղեկավարները։

Օրակարգային հարցերին անցնելուց առաջ մարզպետ Ռոբերտ Ղուկասյանը ողջունել և ներկաներին է ներկայացրել մարզում գործունեություն սկսող նոր նշանակված պաշտոնյաներին, որոնք ղեկավարում են տարբեր պետական կառույցների մարզային ստորաբաժանումները։ Մարզպետը հաջողություն է մաղթել նրանց Սյունիքում աշխատանքի ընթացքում ու արդյունավետ համագործակցության պատրաստակամություն հայտնել։

Ռոբերտ Ղուկասյանը շնորհավորել է նաև մարզի դատախազ Մասիս Պողոսյանին՝ կատարված աշխատանքների ամփոփմամբ Սյունիքի մարզի դատախազության՝ հանրապետությունում 2-րդ անգամ անընդմեջ առաջին տեղը զբաղեցնելու կապակցությամբ։

Այնուհետեև մարզպետի աշխատակազմի գլխավոր քարտուղար Էդգար Մարտիրոսյանը ներկայացրել է նիստի օրակարգային կետերը, և ներկաներն անցել են դրանց քննարկմանը։

Առաջին հարցի վերաբերյալ զեկուցել է Սյունիքի մարզպետի աշխատակազմի ֆինանսական վարչության պետ Մարինե Աբգարյանը։

Նրա ներկայացմամբ՝ 2026 թվականի առաջին կիսամյակի համար մարզի համայնքների բյուջեներով նախատեսված 2 մլրդ 510 մլն դրամ սեփական եկամուտների դիմաց փաստացի հավաքվել է 2 մլրդ 252 մլն դրամ․ նախորդ տարվա նույն ժամանակահատվածի համեմատ արձանագրվել է 24,4 տոկոս աճ։

Հինգ հիմնական հարկատեսակների և վճարների գծով սեփական եկամուտների հավաքման ցուցանիշը կազմել է նախատեսվածի 82,1 տոկոսը՝ նախորդ տարվա համեմատ արձանագրելով 27 տոկոս աճ։

Այս համատեքստում համայնքների ղեկավարներին առաջարկվել է ուշադրություն դարձնել սեփական եկամուտների հավաքման արդյունավետության բարձրացմանը։

Առանձնահատուկ շեշտվել է նաև Գորիս, Տաթև և Տեղ համայնքներում աշնանը նախատեսվող խոշորացման գործընթացի նախաշեմին սեփական եկամուտների հավաքման, ինչպես նաև դեբիտորական և կրեդիտորական պարտավորությունների կարգավորման ուղղությամբ աշխատանքների ակտիվացման անհրաժեշտությունը։ Ֆինանսական վարչությունը պատրաստակամություն է հայտնել համայնքներին ցուցաբերելու մեթոդական և կազմակերպական աջակցություն։

Կառավարություն-համայնք համաներդրմամբ սուբվենցիոն ծրագրերի ընթացքը մարզում ներկայացրել է մարզպետի խորհրդական Կարեն Բալյանը։

Նրա ներկայացմամբ՝ 2026 թվականին Սյունիքի մարզում իրականացվել կամ ներկայումս իրականացվում է 31 սուբվենցիոն ծրագիր, որոնց ընդհանուր արժեքը 8,173 մլրդ դրամ է, իսկ պետական մասնաբաժինը՝ 58,3 տոկոս։

2026 թվականին միջգերատեսչական հանձնաժողովի կողմից հավանության է արժանացել ևս 9 ծրագիր, որոնց իրականացման համար համայնքներում նախապատրաստական աշխատանքներ են ընթանում։

Կ․ Բալյանն անդրադարձել է նաև պետության կողմից 100 տոկոս ֆինանսավորմամբ իրականացվող հրատապ ծրագրերին։ Հիմք ընդունելով ՀՀ կառավարության ծրագրային առաջնահերթությունները՝ մարզի համայնքներում իրականացվում է 13 ծրագիր՝ 1,5 մլրդ դրամը գերազանցող ընդհանուր բյուջեով։ Սրանք հիմնականում մանկապարտեզների ու դեպի դպրոցներ տանող ճանապարհների հիմնանորոգումներ են։

Գյուղատնտեսության ոլորտի ընթացիկ իրավիճակի վերաբերյալ զեկուցել է մարզպետի աշխատակազմի Գյուղատնտեսության և շրջակա միջավայրի պահպանության վարչության պետ Արա Նահապետյանը։

Նա ներկայացրել է պետական աջակցության ծրագրով Մեղրիում թզի մթերման հետ կապված ճգնաժամի հաղթահարման ներկա վիճակը։ Մեղրիում մարզպետի աշխատակազմի կողմից ձևավորված աշխատանքային խումբը շարունակում է մշտադիտարկել թզի մթերման ողջ գործընթացը։ Այս պահի դրությամբ վերամշակման նպատակով արդեն մթերվել է 10 տոննայից ավելի թուզ. գործընթացում ներգրավված են 6-ից ավելի մթերող իրավաբանական անձինք։ Կա պայմանավորվածություն, որ նրանք մթերելու են այնքան, ինչքան առաջարկ լինի։ Պետական աջակցության ծրագրի շրջանակում վերամշակման նպատակով մթերվող թզի յուրաքանչյուր կիլոգրամի համար նախատեսված է 125 դրամ օժանդակություն։ Մթերման գործընթացն այս պահին շարունակվում է, և նախորդ շրջանում առկա դժգոհությունների հետ կապված իրավիճակը, զեկուցողի գնահատմամբ, կարգավորվել է։

Միաժամանակ նշվել է, որ ընթացիկ տարին աչքի է ընկնում բարձր բերքատվությամբ, որն իր հերթին ավելացրել է գյուղմթերքի իրացման և մթերման կազմակերպման հարցերի կարևորությունը։ ← Վերադառնալ ցուցակին